Basile e a so arti

di Annalisa Saccà


Pasquali Basile, natu a Missina e trasferitusi di giovani a Terracina, è essenzialmenti 'n' artista ellenicu. Ma facemu attenzioni ô termini "ellenicu," ca nta stu cuntestu non si riferisci ô piriudu classicu di l'arti greca (mità dû quintu seculu - fini dû quartu seculu aC ), ma ô piriudu dû mediuevu ellenicu ca cuminciau câ transmigrazioni ntâ Grecia e dopu ntâ Magna Grecia dì Dori (ca appuntu ccà divintarunu Elleni) e ca è caratterizzatu dû stili geometricu (X-VIII seculi) e ca havi a so cchiù auta forma d'espressioni
artistica ntâ pittura vasculari.
In Basile non ci sunu anfori, né leKythoi, o vasi supra a li quali lassari a propria personali calligrafia pittorica, eppuri è comu si ci fussiru. I so quadri nni sunnu testimoni. Non sunu tili, ma cumpensati di lignu, mai rettiliniari, mai cunfinanti, ma fatti a forma di ovali, senza spiguli, oblunghi, comi si vulissiru continuari un discursu già cuminciatu e a lassari interrottu un discursu ca s'havi a finiri. Eccu allura figurazioni di corpi muzzi, testi tagghiati, vrazza monchi (vidi quadri comu "Annunciazione", "I collezionisti di Murici",

"Il Ratto di Venere", "Vulva Lactuca" "Amanti" ), ca rimannanu a na interezza ca è fora dû spaziu pittoricu dû tavulatu, ca î mudella î cunfina senza rennirli rigidi, anzi pirmettunnici di raccuntari u spaziu dâ so assenza.

Basile allura è ellenicu. E ellenicu voli diri suprattuttu geometricu. Ma non si tratta sulu di geometria di formi assai comuni a tanti artisti. Chidda ca domina u scenariu artisticu di Basile è a geometria dû spiritu.

.............Un spiritu geometricu ca cummina i so signi quasi in manera architettonica in modu ca a  distribuzioni di formi riproduci u ritmu e l'articulazioni d'un ordini armonicu. "I Collezionisti di murici " di Basile è un ottimu esempiu di stu modu di prucederi.
A forma dû circu, dû triangulu e dû rettangulu sunu rappresentati in alternanza nta l'ovali
matericu dû compensatu . L'effettu gestalticu è di na triangolazioni acentrica cu tri figuri triangulari, a testa di li quali assemi a li vrazza duna vita a altrettanti trianguli ca si moltiplicanu nta l'effettu dî vistiti, trianguri puru iddi, però smanciati dî formi circulari dî minni e di cosci. Sti figuri parunu assittati attornu a un probabbili taulu ca si pari rettangolari ntâ prospettiva è inveci ntâ so bidimensionalità un triangulu acefalu puru iddu,cumpinsatu però di una dî tri figuri suprammisi ca forma un effettu armonicu cu ddi figuri ca ci stannu a latu. Insumma un giocu raffinatu di formi ca cumparunu e scumparunu, sciugghiennusi in pura armonia comu nta na fuga musicali.

Si u spiritu geometricu di Basile servi a cuntari diacronicamenti a tissitura dâ so opira, accussì radicata ô so passatu ellenicu, a scelta dî cuntenuti catapulta sincronicamenti a l'artista nta l'epuca muderna presenziata cu na unica e ricurrenti immagini, strumentalizzata a rapprisintari l'accadimenti di l'anima: a fimmina.

A fimmina in Basile funziona comu geroglificu ca ô stissu modu dâ pittura egiziana pî mura, servi pi cuntari pezzi di vita, o ntô casu di Basile un muvimentu dâ psichi, a secunnu dû quali autri pittogrammi si cci trovanu vicinu. Pi chistu putemu diri ca è un simbulu ca rimanna a quacchi autra cosa, circannu di dari i connotati a l'autru, ca s'incarna di vota a vota in svariati figurazioni ca Vito Apuleio giustamenti denominau "travestimenti". Basta pinsari â cullezioni d'incisioni priparati pû libru di Mario Guidotti Il Centro e il Labirinto (1994). Ccà a classica e ricurrenti figura fimminili basiliana si ricostruisci sempri nova e cacianti tramiti quacchi elementu usatu scenograficamenti. Si passa accussì dû cappeddu e trumma/citofunu di Fellini, â moltiplicazioni figurali di l'eco, ô gettu d'acqua dâ Sorgente , ê jammi multipli dû Cerchio â deformazioni figurali dû Vascello e a l'elementu talassicu ntô Rischio di Naufragio. Na cullezioni, chista, ca si concludi cu l'ultima incisioni dû libru Il Silenzio, unni u tipicu corpu fimminili di Basile è sostituitu di na basi c'un fustu/frammentu di culonna scanalata supra la quali si iazza na facci duci e allungata c'assumigghia ô stissu tempu â riggina Nefertiti e a li cariatidi di l'Eretteu. A capiddatura esaggirata ê lati e un pocu chiatta di supra comu si vulissi fari vidiri un capitellu, si presta comu continuazioni dâ culonna a suppurtari un pisu assenti . Infini a prisenza schiaccianti dâ zona umbratili ca sovrasta u profilu di fimmina e l'assenza dû corpu/palora, si iunciunu a rapprisintari u silenziu nta nu spaziu nudu , fattu cchiù priziusu sulu di na cullana ca, pusata supra u coddu dû ritrattu, ni accentua a regalità.

 figura fimminili in Basile ntâ so bimidimensionalità di affrescu arcaicizzanti, evuca a cultura apollinea e, ô stissu tempu, l'atemporali dionisiacu nta l'anima. Accussi u profilu, a forma triangulari o circulari dî capiddi, paralleli â triangulazioni dî vrazza spissu in monobloccu cû bustu velu/corazza, evuca n'antica divinità unni li minni suggerisciunu l'immagini dâ granni matri dispensatrici di fertilità.

Ma dû cintu 'n sutta, pi dirla ccu Dante, è tutta n'autra cosa. U dionisiacu ca guverna l'istinti e i pulsioni scuri di l'animu si trasformanu e si sciogghiunu ntâ maliziosità tentatrici d'un nodu ca vulissi incantari.

E allura non è sulu a ricurrenza di un natichi scuperti ca svelanu i pulsioni sessuali ca sunu trattinuti dâ cintura a ghiri supra, ma sunu soprattuttu l'elementi dû vistiariu comu i giarrittieri, i pon pon, i tacchi a spillu, recuperati usannu a manera postmoderna di na tradizioni ca va dû Decadentismu ô stili Liberty a la Belle Epoque, a stabbiliri i reguli dû giocu, unni l'avvertimentu dâ sensualità, frinata e cuntrullata dû riguri geometricu supira a sensualità stissa. (Pensu a li "Amanti" unni u desideriu si traduci nta na coscia divaricata vistuta di giarrittera, pon pon e taccu a spilla supra la quali si posa cu ducizza fittu fittu a figura di l'amanti senza facci.)
Discepulu dâ tradizioni mediterranea, Basile ha travagghiatu usannu varii materiali.

L'incisioni ci pirmittiu di scupripri un munnu arcaicu chinu di misteri, a pittura ci desi tonalità volumetrichi novi, e l'esperimenti cû bronzu ci desi l'opportunità di dari spissuri e fisicalità ê so figuri bidimensionali..
Ntâ pittura di Basile dominanu i culuri ancestrali comu i culuri dâ terra e dû mari .
Nun sunu mai vivi ma sfucati, parunu cuperti di na patina sbiadita ca ci da ôstissu tempu u culuri circulari di l'atemporalità.
In "Offertorio," pir esempiu, u blu liniari e staticu dû mari dominanti ntê vistiti e capiddi
cedi davanti ô culuri circulari e mobili dâ terra/madduni dû corpu (chiappi e minni). L'effettu finali è chidu di na dilicata sensualità e tinnirizza espressa iconograficamenti dû gestu dâ figura ca offri na conchiglia: u fruttu eroticu dû piaciri godutu.
Narraturi di formi archetipali, evucaturi di mudelli arcaici respirati ntâ terra siciliana , Basile
comu artista è oggi n'aneddu di congiunzioni tra un passatu ripropostu attuali e un presenti anticu rivisitatu.

From ARBA SICULA
Journal of Sicilian Folklore and Litterature
Nunbers 1 & 2 Spring & Fall 1996
St. John's University . New York